Mohsin Naqvi poetry
Zakhm phir yaad puraane aaye
Baar-ha unko manaaya to hamein
RooTh jaane ke bahaane aaye
Phir mujhe toot ke chaaha usne
Phir bichhaRne ke zamaane aaye
Muskuraa kar hamein milne waale
Zindagi bhar ko rulaane aaye
Kitni mahroom thiN neendein unki
Khaab bhi jin ko jagaane aaye
Teri chahat ne Thaharne na diya
Raah mein kitne thikaane aaye
Tu nahi hai to hawa ka jhoNka
Ghar ki zanjeer hilaane aaye
Dil bujhaa hai na jale hain kheeme
Aap kyuN jashn manaane aaye
Isi ummeed pe jaago yaaro!
Ab woh kis waqt na jaane aaye
Raas aaya jinhein sehra ‘Muhsin’
Unki qismat mein khazaane aaye
(Mohsin Naqvi)
tagged best ghazal, best ghazals, best shairy, chhoti bahr, famous ghazal, fine ghazal, modern shairi, mohsin naqvi ghazals, shairy in urdu, top ghazals, udas shairy, urdu ghazals, urdu poetry, urdu shairy
Bazaahir Log Kitne MehrbaaN The
Bazaahir log kitne mehrbaaN the !
Magar dukh banTne wale kahaan the
LaboN per muskurahat ki dhanak thi
Lahoo lathre sukhan zer E zubaN the
Jo manzil aashna the wo musafir !!
Pus e khak e ghubaar e karvaaN the
Mai aise shahr ka baasi bana hooN
MakiN patther the, shishe k makaN the
Jala jab aashyaaN to hum ne jana
K tinke bhi hawa ke raazdaaN the
Kisi ne haal tak puchha na ‘Mohsin’
Hum ahl e dil bhi kitne rayegaaN the
By: Mohsin Naqvi
tagged best ghazal, best ghazals, best shairy, famous ghazal, fine ghazal, modern shairi, mohsin naqvi ghazals, shairy in urdu, top ghazals, udas shairy, urdu ghazals, urdu poetry, urdu shairy
Bichhar Ke Tum Se Yeh Sochun …
BichhaR ke tum se yeh sochuN, K dil kahaaN jaayeSehar udaas kare, shaam raayegaaN jaaye
ZameeN – badar jo hue ho to mere ham-safaro
Chalay chalo K jahaaN tak yeh aasmaaN jaaye
Tamaam shahr mein phailii hui hai tanhaayii
Ye dil jawaaN sahi, lekin kahaaN kahaaN jaaye
JaluN to yuN K azal jagmagaa uThe mujh se
BujhuN to yuN K abad tak mera dhuwaaN jaaye
Abhi to dil se nikal kar zabaaN tak aayi hai
Kise khabar K kahaaN tak yeh daastaaN jaaye
Qadam-qadam pe hai zandaN ravish-ravish pe salib
Koi to ho jo K jo ab bahr E imtehaaN jaaye
BichhaR chalaa hai to meri duaa bhi leta ja
WahaaN-wahaaN mujhe paye, jahaaN-jahaaN jaye
Main apne ghar ki taraf jaarahaa huN yuN ‘Muhsin’
K jaise luT ke, kisi ban mein kaarvaaN jaaye
(Mohsin Naqvi)
tagged best ghazal, best ghazals, best shairy, famous ghazal, fine ghazal, modern shairi, mohsin naqvi ghazals, shairy in urdu, top ghazals, udas shairy, urdu ghazals, urdu poetry, urdu shairy
Tark E Muhabbat Kar BaiThe Hum …
Tark E muhabbat kar baiThe hum, zabt E muhabbat aur bhi hai
Ek Qyaamat beet chuki hai, ek Qyaamat aur bhi hai
Hum ne usi ke dard se apne saaNs ka rishta joR liya
Wana shahr me zindaa rahne ki ek surat aur bhi hai
Doobta suraj dekh ke khush rahna kis ko raas aaya
Din ka dukh sah jaane walo, raat ki wahshat aur bhi hai
Sirf rutoN ke saath badalte rahne par mauQoof nahi
Us me bach_choN jaisi zid karne ki aadat aur bhi hai
Meri bheegti palkoN par jab us ne donoN haath rakhe
Phir yeh bhed khula in ashkoN ki kuchh Qeemat aur bhi hai
Us ko gaNvakar ‘Mohsin’us ke dard ka Qarz chukaana hai
Ek aziyyat maaNd paRi hai, ek aziyyat aur bhi hai
(Mohsin Naqvi)
tagged best ghazal, best ghazals, best shairy, famous ghazal, fine ghazal, modern shairi, mohsin naqvi ghazals, shairy in urdu, tavil bahr, top ghazals, urdu ghazals, urdu poetry, urdu shairy
Wafa MeN Ab Yeh Hunar Ikhtiyaar Karna Hai …
Wafa meN ab yeh hunar ikhtiyaar karna hai
Woh sach kahay na kahay aaitebaar karna hai
Yeh tujh ko jaagtay rahnay ka shouq kab say huaa?
Mujhay to khair teraa intezaaar karna hai
Hawa ki zad meN jalanay haiN ansoN kay chiraagh
Kabhi yeh jashan sar E rahguzaar karna hai
Woh muskura kay naye waswasoN meN daal gaya
Khayaal tha K usay sharamsaar karna hai
Misaal E shaakh E barhana khizaN ke rut meN kabhi
Khud apnay jism ko be – barg O baar karna hai
Teray firaaq meN din kiss tarah kattaiN apnay
K shuGhal E shab to sitaray shumaar karna hai
Chalo yeh ashak hi moti samajh kay baich aayaiN
Kissi tarah to hamaiN rozgaar karna hai
Kabhi to dil meN chhupay zakhm bhi numayaaN hoN
Qaba samajh kay badan taar taar karna hai
Khuda khabar yeh koi zid K shouq hai ‘Mohsin’
Khud apni jaan kay dushman say payaar karna hai
Ta’zeer-E-Ehtimaam-E-Chaman Kaun De Gaya …
Ta’zeer-E-ehtimaam-E-chaman kaun day gaya
Mujh ko gulaab jaisa kafan kaun day gaya
Daikhay jo khadd-O-khaal to socha hai baarhaa
Sehra ki chaaNdni ko badan kaun day gaya
Meri jabeeN ki saari lakeeraiN teri ataa
Lekin teri qaba ko shikan kaun day gaya
Teray hunar mai khilwat-E-khushboo sahi magar
KaantoN ko umr bhar ki chubhan kaun day gaya
Jungal say poochti haiN hawaaoN ki barhami
Jugnoo ko tairgi mai kiran kaun day gaya
Kis ne basaaye aaNkh mai ashkoN kay qaaflay
Be-ghar musaafiroN ko watan kaun day gaya
Tujh say to khair pal ki musaafat ka saath tha
Meray badan ko itni thakan kaun day gaya
ToRa hai kis nay nok-E-sinaaN par sakoot-E-sabr
Lab bastagi ko taab-E-sukhan kaun day gaya
‘Mohsin’ wo kaayinaat-e-ghazal hai ussay bhi daikh
Mujh say na pooch mujh ko yeh fun kaun day gaya
Kabhi Jo CheR Gayee Yaad-E-RaftagaaN Mohsin …
Kabhi jo cheR gayee yaad-E-raftagaaN Mohsin
Bikhar gayee haiN nigaaheN kahaaN kahaaN Mohsin
Hawa ne raakh urraaii to dil ko yaad aayaa
K jal bujheeN mere khaabon ki bastiyaaN Mohsin
Kuch aaise ghar bhi miley jin meN ghooNgatoN k iwaz
Hui haiN dafn dopattoN meN larrkiyaaN Mohsin
KhaNdar hai ahd-E-guzishta na chhu na chheR isay
KhuleN to band na hoN is ki khirrkiyaaN Mohsin
Bujha hai kaun sitaaraa k apni aankh k saath
Huey haiN saare manaazir dhuaaN dhuaaN Mohsin
Nahi k us ne ganwaaye haiN maah O saal apne
Tamaam umr kaTi yuun bhi raaegaaN Mohsin
Mila to aur bhi taqseem kar gaya mujh ko
SameiTna theeN jisay meri kirchiyaaN Mohsin
KahiN se us ne bhi toRa hai khud se rabt-E-wafa
Kahin se bhool gaya maiN bhi daastaaN Mohsin
BichhaR Ke Mujh Se Kabhi Tu Ne Yeh Bhi Sochaa Hai …
BichhaR ke mujh se kabhi tu ne yeh bhi sochaa haiAdhuuraa chaand bhi kitnaa udaas lagtaa hai
Ye lamhaa vasl kaa hai isko raayegaaN na samajh
K is ke baad vahii duuriyoN kaa sahraa hai
Kuchh aur der na jhaRtaa udaasiyoN kaa shajar
Kise Khabar tere saaye meN kaun baiThaa hai
Ye rakh-rakhaao muhabbat sikhaa gayii us ko
Vo ruuth kar bhi mujhe muskuraa ke miltaa hai
MaiN kis tarah tujhe dekhuun nazar jhijhakti hai
Teraa badan hai K yeh aaiinoN kaa dariyaa hai
Ye Dil, Ye Paagal Dil Mera …
Ye dil, ye paagal dil mera kyuN bujh gayaa? aavaargii
Is dasht meN ik shahar thaa wo kyaa huaa? aavaargii
Kal shab mujhe be-shakl sii aavaaz ne chauNkaa diyaa
MaiN ne kahaa tuu kaun hai? us ne kahaa aavaargii
Ik tuu k sadiyoN se mere ham_raah bhiii ham_raaz bhii
Ik maiN k tere naam se naa_aashnaa aavaargii
Ye dard kii tanhaa_iyaaN, ye dasht kaa viiraaN safar
Ham log to uktaa gaye apanii sunaa aavaargii
Ik ajnabii jhoNke ne jab, puchhaa mere gham ka sabab
Sahraa kii bhiiigii ret par maiN ne likhaa aavaargii
Le ab to dasht-e-shab kii saariii vus’ateN sone lagiiN
Ab jaaganaa hogaa hameN kab tak? bataa aavaargii
Kal raat tanhaa chaaNd ko dekha tha maiN ne Khaab meN
‘Mohsin’ mujhe raas aayegii, shaayad sadaa aavaargii
Zikr-e shab-e firaaq …
Zikr-e shab-e firaaq se wehshat usay bhi thee,
Meri tarah kisi se muhabbat usay bhi thee.
Mujh ko bhi shoq tha naye chehron ki deed ka,
Rasta badal k chalne ki aadal usay bhi thee.
Us raat dair tak wo raha mahav-e guftagoo,
Masroof main bhi kam tha faraagat usay bhi thee.
Mujh se bichhar k shahar main ghul mil gaya wo shakhs,
Haalaanke shahar bhar se adaawat usay bhi thee.
Wo mujh se barh k zabt ka aadi tha jee gaya,
Warna her aik saans qayamat usay bhi thee.
Sunta tha wo bhi sab se puraani kahaaniyaan’
Shayad rifaaqaton ki zaroorat usay bhi thee.
Tanha husa safar main to mujh pe khula ye bhaid,
Saaye se pyar, dhoop se nafrat usay bhi thee.
Mohsin’ main us se keh na saka yun bhi haal-e dil,
Dar-pesh aik taaza museebat usay bhi thee..
0 Comments